Pro 26 | NdeIBE | STEP | Njengongqwaqwane ehlobo loba izulu ebusika kanjalo udumo alusifanelanga isiwula.

Proverbs 26

1 Njengongqwaqwane ehlobo loba izulu ebusika kanjalo udumo alusifanelanga isiwula.

2 Njengentaka ephaphazelayo loba inkonjane entwezayo, sinjalo isiqalekiso esingelasizatho kasinamatheli.

3 Isiswebhu ngesebhiza, amatomu ngakababhemi, loswazi ngolwemihlane yeziwula!

4 Ungabophendula isiwula ngendlela yobuwula baso, funa ube njengaso wena ngokwakho.

5 Phendula isiwula ngendlela yobuwula baso, sizabona kungathi sihlakaniphile.

6 Njengokuziquma izinyawo zakho loba ukunatha itshefu, kunjalo ukuthumela umlayezo ngesiwula.

7 Njengemilenze eqhugezelayo eyomuntu oqhulayo sinjalo isaga emlonyeni wesiwula.

8 Njengokubophela ilitshe esavutheni kunjalo ukupha udumo koyisiwula.

9 Njengogatsha lwameva luphethwe yisidakwa sinjalo isaga emlonyeni wesiwula.

10 Njengomtshoko ociba loba ngubani odlulayo unjalo oqatsha isiwula loba ngubani ozedlulelayo.

11 Njengenja ebuyela emahlanzweni ayo kanjalo isiwula siyabuphinda ubuthutha baso.

12 Uyambona yini umuntu ozibona engohlakaniphileyo? Kulethemba elingcono ngesiwula kulaye.

13 Ivilavoxo lithi, “Kulesilo endleleni, isilwane esibi siyazula emigwaqweni!”

14 Njengesivalo esitshibilika ngamabhanti aso kanjalo ivila liphenduka embhedeni walo.

15 Ivila litshonisa isandla salo emganwini; lehluleke ukubuyisa isandla emlonyeni lidle.

16 Ivila lizibona lihlakaniphile kakhulu okwedlula abantu abayisikhombisa abangaphendula ngokuhlakanipha.

17 Njengomuntu odonsa inja ngendlebe unjalo umuntu othi edlula angenele ingxabano ingesiyakhe.

18 Njengohlanya luphosa izikhuni zomlilo kumbe imitshoko ebulalayo,

19 injalo indoda ephoxa umakhelwana wayo ibisisithi, “Bengizidlalela nje!”

20 Nxa kungaselankuni umlilo uyacima; nxa kungaselakunyeya ukuxabana kuyaphela.

21 Njengamalahle avuthayo loba njengenkuni emlilweni, unjalo umuntu othanda ingxabano ekuvuseni inkani.

22 Amazwi omuntu onyeyayo anjengezibiliboco; angena ekujuleni kwenhliziyo yomuntu.

23 Njengokulolongeka kwesitsha sebumba sikhazimule kunjalo ukuthakazelela kwezindebe zenhliziyo elobubi.

24 Umuntu olenhliziyo embi uvala ngezindebe ezimnandi, kodwa enhliziyweni yakhe ufihle inkohliso.

25 Loba ukukhuluma kwakhe kumnandi, kodwa ungaze wamkholwa, ngoba inhliziyo yakhe igcwele izethuko eziyisikhombisa.

26 Inzondo yakhe angayivala ngobuqili, kodwa ububi bakhe buzavezwa obala ebantwini.

27 Umuntu angagebha umgodi, uzawela kuwo; umuntu angagiqa ilitshe, lizaphenduka ligiqikele phezu kwakhe.

28 Ulimi oluqamba amanga luyabazonda labo olubalimazayo, lomlomo okhohlisayo uletha incithakalo.